بقلمي ...
حد يقولي دا اسمه ايه
ان مكنش عشق فيكي
لما تبقي ف عيني بنت
لسة بفيونكة وضفاير
واما اكون ف عنيكي طفل
وف حضنك فرحان وطاير
والقي دق القلب زايد
لما بتفيض المشاعر
والحنين جوايا فايض
فجأة الاقي نفسي شاعر
باكتب احساسي ف قصايد
كل كلمة طالعة ليكي
حد يقولي دا اسمه ايه
ان مكنش عشق فيكي
واما احس ان انتي امي
وارمي بحمولي عليكي
لما كان يشتد همي
افتكر لمسة ايديكي
لما تخديني وتضمي
والحنان باين عليكي
ان مكنش عشق فيكي
لما ابطل اشتياق
لأي حد الا ليكي
وقلبي يزهد ف النساء
واختصرهم بس فيكي
واكتشف معنى الوفاء
لما اكون امين عليكي
حد يقولي دا اسمه ايه
ان مكنش عشق فيكي
واما تعيشي الاكتفاء
وابقى انا بس ف عنيكي
وحدي دون كل الرجال
حب كافي ومراضيكي
وان غيري مستحيل
فيه انسان يملا عنيكي
حد يقولي دا اسمه ايه
ان مكنش عشق فيكي
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة