عيد أمي
صباحك حب يا أمي
يا أُم لكل من دمي
يا أم لكل خلاني يشيلو همي
قالولي اليوم ده بقي عيدك
حلفت أهديكي فيه عمري
دا يوم عيدك دا يوم عيدي
ومن دمك نَبَض قلبي
صباحك عمر يا امي
دا كل الناس
بيدأ يومها نور الشمس
وانا يومي مهوش محسوب
لو أفتح عيني ولا أشوفك
أو أسمع همس
يترد لصداه قلبي
فيتبسم
يدوب وياه صراع أفكاري أو يأسي
يا سر معاه تموت عني جبال همي
صباحك رزق يا امي
دي دعوه صمت من قلبك
ملاك حارس
ولو كل البشر فارس
بكون بينهم ملك أمري
أنا رافض يكون عيدك فيوم محسوب
وأنا عيدي ليلاتي بشوفه ف أحضانك
ولما تغمضي رموشك
ساعة نومك علي صورتي
وصوت همسي علي جبينك
وبدعيلك صباحك عمر يا عمري
________________________
أحمد مخيمر 21 مارس 2017
ترانيم عشاق
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة