امي بقلم السيدابوطاحون

أمي ..

نور الزهور المستحمي

في جبل الضيا ..

جوه مقام الأوليا

وفي حضور الأنبيا

أمي ..

اللي قلقانة عليا

في سكاتي وفي الكلام

أمي ..

اللي ما تعرف تنام ..

غير  لما انام

ولما تهرب ..

راحة البال من إيديا

تلقاها واقفه ..

زي عشق النيل

علي شطوط الخيال ..

تقول وتبني ف الجمال

وتحط طوبة جنب طوبة

جنب طوبة وكام سؤال

تحكي الحكاوي المفرحه

وتنادي .. أذن يا بلال

يهرب شيطان الهم من قلبي

وتدعيلي ..

ولما النوم يجافيني

تغنيلي ..

يقوم النوم يغازلني

يدلعني .. يهدّيني

يدفيني..

وأروح في النوم 

_________

أقوم من النوم ..

علي صوتها البساتيني

عصفور صغير

علي الشباك يناديني

واقف يحفظني النشيد

" و ان مت يا أمي ماتبكيش ..

راح أموت علشان بلدي تعيش  "

وأنا يومها ابن ..

وكان وحيد

شفت عيونها الطيبة

متخوفة ومستغربة

من يومها بحلم ان أنا

راح أموت شهيد
_______

أمي اللي دايما باسمة

ولابسه أحلي توب زفاف

و ف نن قلبي معلمه

ومُرتبة و منظمة 

وقلب أطهر م  العفاف

رغم العواصف

والليالي المؤلمة

الظالمة والمظلمه

تلقاها هادية وحازمة

راحة مريحة

جوه عينها تضمنا ...

من قبل ما أبلغ البلوغ

كات أمي راحت مننا ..

راحت في رحلة للسما

من يومها وجفاني المنام

زوريني يا أمه ف المنام

يمكن أنام .............