طقاطيق
من ديوان/غواص فى بحر الأمل
للشاعر/ مصطفى فريد
الصبح طالع بيضحك
والطير يقول يا معين
صبحنا نشكر لحمدك
على رزقنا ساعيين
وانت يا ناسى لربك
مهموم فؤادك حزين
ما تسيبش حزنك يشدك
لتدوس عليك السنين
افتح بيبانك لصبحك
الدنيا دامت لمين
مشينا السكة بالمقلوب
كان مطلوب نخطيها
قلوبنا ترضى بالمكتوب
ولا نعاتب لياليها
طرحنا عمرنا المشطوب
لقينا القسمة مش فيها
خرجنا منها من غير توب
سيبنا حاضرها وماضيها
وغالب كنت او مغلوب
حسابك عند باريها
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة