مش كل من لضم الحروف
شاعر
ولا كل من عامل مكسوف
بمشاعر
الشعر ده إلهام
مش هبد أي كلام
الشعر دا أنغام
وانتا بتكتبه
وكمان بترتبه
بين صحيان ومنام
الشعر دا موهبة
من عندك ربك هبة
والعاطفة متلهلبة
بنار برد وسلام
الشعر وزن وقافية
مبيتخدش عافية
وكلامه ياناس بلا آفية
بعيد عن الأوهام
الشعر ياناس أفكار
هدوء واستقرار
الشعر يستر عَوْرة
لو حتخليها ثورة
بيشعللها نار
الشعر مش مهرجان
يقوله إنس وجان
بفلوس وبالمجان
الشاعر شخص واعر
عمره مايبقي داعر
الشعر ده أحلام
الشعر بيصحيك
الشعر بيدفيك
وهوه اللي بيخليك
يقولوا عليك دا شاعر
الشعر تحس بغيرك
وغيرك يلقي خيرك
ويشم جمال عبيرك
الشعر بيقدرك
الشعر بيعبّرك
الشعر بيحذرك
مش شرط يصقفولك
ولا تسمع التصقيف
ولا بشهادة يقفولك
الشعر دا تكليف
محتاج للتثقيف
وبطبعك تبقي عفيف
تتكلم عن رغيف
والنايم فوق رصيف
تمدح ف الإيجابي
وتقول برافو يااحبابي
وللفساد ياخرابي
ولما أوزن كلامي
وأقول امسك حرامي
مش ريش ف البقشيش
شعرك لازم يعيش
من غير فلوس بقشيش
وأسعد ما ف الشعر
تعبّر عن دراويش
وأسعد حاجة لما
وهمّا ف عز الغمة
تنادي عليك اللمة
بشعرك احنا نعيش
ياشاعر الحرافيش
غصبن عنه وعنك
ومهما يكتر زَنّك
أنا شاعر الحرافيش
واللي مش عاجبه قولي
ف داهية ميلزمنيش
هشام سليم
كنج العربي
شاعر الحرافيش
الإسكندرية مصر
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة