كاتم في جوفى الآه
وراضي بالمكتوب
وودي لأهلي تاه
ودايما ببات مغلوب
طلبي الموده صداه
عايزين سداده بطوب
ماهو اللي قبلي تاه
وأخره مات منكوب
بمد طوق للنجاه
ألاقينى للهلاك مسحوب
حقي في أهلي زكاه
طايله يادوب سرسوب
اللي خلف سكناه
عاطي للمودة هروب
واللي بيسمع آه
كأنه شراب عنوب
واللي فروعه حجباه
عن وصل أصله بفوب
واللي الحياه لاهياه
لا يهمه مين هيدوب
لو صادف يوم رؤياه
كأنه شاف مكروب
هتقول لي الكلام إياه
والأصل والمكتوب
والدم ما يبقى مياه
خليك للوصال مندوب
دا اللي همل مرعاه
عمره ما يوم هيتوب
واللي عطيلي قفاه
كله فى كتاب مكتوب
والرب جل علاه
هيحاسب المعيوب
وحق القريب مغزاه
طريق لرضا المحبوب
...... وائل سعيد .....8/12/2022
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة