...........
معنديش حاجه احكيها كل اللي باقي دمعتين خاينين ..
مش محتاجين للشرح ..
كل اللي باقي م الحكايه جرح ..
صعب الوجع يتوصف عدى حدود البوح ..
يوم م الحروف وقفت شاهد عيان ع الروح ..
حضر التجلي والدموع ع الورق..
ماتت قصيده قبل ما تتخلق ..
انا العاجز عن التعبير ..
صبحت اسير ما بين الصمت والذكرى ..
واديها الفكره بتحايل جناب المعنى يتجلى..
كأن الشعر ماسك ع الحروف ذله ..
دانا و الله والنعمه بداري الدمع بقصيده
بتظهر زي تنهيده...
و اديني بعك..
وادي الحرف جاي يزك.. ويرمي نفسه من روحي فيتعثر ..
يشوف الجرح فيقصر ويبقي ضعيف ..
قصاد الاهه والايام تبان المفردات تخاريف..
وانا عمري ما كنت ف يوم شاعر صنعه ولا حريف ..
ساعات كم الوجع يغني عن التعريف..
دي روح مش عايزه تتكلم
بتتألم في صمت مميت ..
فتبقي عبيط تبان كلمه ف اشعارك كما الهذيان..
صراع داير ما بين شاعر واخوه الانسان..
طب اكتب ليه... ؟؟
عشان اكتب بعيش حاله..
وتلقي دماغي شغالة..
تاخدني الفكره للزكرى فاموت تاني..
ويمشي النعش وحداني..
طب اكتب ليه.. ؟؟
وسيدنا الشعر مش ستار.
وعامل فيها جيفارا ورافع راية الثوار...
وانا مش حمل لبس البدله بالمقلوب..
ولا قادر ولاهقدر احدف طوب..
طب اكتب ليه..؟؟
ده عبدوا العجل ياخوانا
وقالو عليه اله جابر لكسر خواطر المساكين...
طب اكتب ليه...؟؟
مادام الحرف مش قادر يجيب حطين
طب اكتب ليه...؟؟
وانا والشعر متفقين
بإن الحرف مش راكع
وان العمر مش راجع
وان الفجر مش طالع
وان الزيف صبح تشريع
وان المجد للي يبيع
وان العزبه عزبتهم
وان الحسبه حسبتهم
طب اكتب ليه يا اخونا
وعمر الشعر مااتغنى بدون تطبيل
بحق النيل وعشاقه
بحق الليل واشوقه
ما هكتب شعر من تاني في زمن الكدب والتضليل..
وهكتب ليه ؟؟؟؟؟؟
.......
عصام ابوالعلا
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة