( يا عم ياللي ) :
يا عم ياللي بتتباهى
بإنك سافِل
وف كل قعدة كلام خارج
وفاكر إنَّك بسفالتك
بتخوِّف ناس
ده انت لذنوبك وذنوبهم
دايماً شايل
ما كل شِتمَة بتشتِمها
بتترَّد عليك
وكل لعنة بتلعنها
بتهين والدِيك
إمسك لسانك يا ابن الناس
واحفظ ادبك
حتلقى ناسك تحترمك
ويقربوا ليك
فرحان بإن الناس هايباك
علشان سافِل
كان نفسي تبقى الناس هايباك
علشان راجِل
مش هيبة واللَّهِ دي خيبة
يا خسارة عليك
عن ذكر ربك ليه لسانك دايماً غافِل ؟
بكلمة حلوة ما بين جيرتك
راح تعلى لفوق
ولما تيجي ف يوم سيرتك
هيقولوا ده ذوق
يا بخته اللي يبات مظلوم
ولا بات ظالم
ربك حفيظ ولا بيضيعشي
ف سُلطانُه حقوق
ربك حفيظ ولا بيضيعشي
ف سُلطانُه حقوق
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة