نور القمر كان يستحي
لو بس شاف وجه النبي
دا الجذع حن من الفراق
حتى الجمل ليه بيشتكي
الأرض تحضن خطوته
ومن مسك روحه تنتشي
يابخت كل طريق مشاه
ولمسه وشافه وكان معاه
نوره يبان بين جبهته
والشمس فوقه بتنطفي
جبريل حضر ورما السلام
على قلبه بأسم الله الأحد
وحي النبي كان من كلام
واحد صمد ومالوش ولد
وفى حضن زوجته بيترمي
من رهبة المولى العظيم
حبيبي أصله ياناس يتيم
ربي أجتباه بلطفه الكريم
وبفضل لطفه بنهتدي
شاف الألم لجل الطريق
وابو بكر ليه خير الصديق
شال عنه ياما وقت ضيق
والدعوة لسة بتبتدي
عامر يمر معاه الغنم
يمسح أثار سيدنا الحبيب
تسمع لأثره صوت نغم
تبكي الرمال وتقوله سيب
دا ياوعدها مين زييها
نالت شرف رجل النبي
صاحبه يخاف من قلب غار
لعيون خبيثه تلمحه
بس الإله كان له القرار
إن عيونهم تتعمي
فى السر راح هاجر عُمر
متخفي من شر النفوس
لجل الرسول شاف الضرر
من عدله ياما خدنا دروس
لو كان شيطان على سكته
يهرب في ثانية ويختفي
صلوا على خير العباد
صلى عليه ربي وزاد
وصلاتنا ليه فرض وجهاد
بكفه الشريف راح ننسقي
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة