"البشر وطبايعو"
البشر عديدة الطبايع
قليل فيهم الحر الطايع
وكثيرهم بالمكر مايع
يقضي حياتو ضايع
يدي ويجيب فالسوايع
تلفان هايف صايع.
كلا منهم علاش مطوي
شي بالسم البارد يكوي
إعمر فالشوارج ويخوي
شي وافق ما لقا ما يلوي
وشي يسلق ويشوي
بلسان الطنز الخاوي
شي عند راسو شاطر
فكل مجمع مجود حاضر
يخدع النفوس والخواطر
بالكﻻم المعسول المتقاطر
يبدل وجهو كيف لكوادر
ما يراعي ربو القادر
يتسنا الحملة باش يهرف
ومن كل بير يشرب ويغرف
همو راسو واللي يعرف
حاضي جيبو لا ينشف
يبيع فالناس من تحت الدف
إلى خطاه لخواض يتلف
والمسكين بهمو ينزف
من قلت الشي كيتفتف
عايش ف حياتو مقهور
مغلوب على أمرو مضرور
ف زمان لبهوت ولفجور
والجاه والمال ولفشور
ويبقا البشر كلا وطبايعو
وكلام الحق شكون سامعو
سبحان اللي خلقو وصانعو
وبلطفو الخفي حافظو وجامعو
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة