و هيفضل فيا حنين ليكى
و هتفضل فيكى حاجات تتعاش
و الحلم تملى هيندهلى
و ان كان ف الزحمة رحل و ما جاش
جوايا حروفك الف دليل
على قلب هواكى و ما بينساش
على روح رسماكى جمال مكنون
و عيون غير اسمك ما بتقراش
ما انا فيكى زمان حسيتها حياة
و عرفت فى حضنك انى انام
على حجرك كنت باروح ف النوم
و النوم كان دايما فيه احلام
و نسيت على صدرك خوف ورا خوف
و مسحتى دموعى باحلا كلام
سامحينى ان قلت بقيتى سراب
و وجع و دموع و بقيتى الام
جراحه و عاشقة لريحة الموت
و ايام بتفوت ... و مبتحسيش
بتبيعى رخيص يمكن ببلاش
خليتى العشق يروح ما يجيش
نمتى و طولتى النوم ف كابوس
خبطنا كتير و انتى ما تصحيش
واقفين على بابك لينا سنين
و فى صمتك معنى لأنه مفيش
و انا غصبن عنى كتير باشتاق
و باشوفك دايما بنت بنوت
عذراء رغم انك ع الطرقات
تحت العواميد فى ليالى سكوت
بتقضى اللى مع ناس خاينين
و بتحرمى عشاقك ريحة القوت
مش عارف اقولك امتى و فين
هالاقينى فى روحك مرة بافوت
#فهمى_على
دار نشر القلم للطباعة والنشر والتوزيع
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة