الحياة هى الحياة
و الزمن ماشى بهواه
ناس بتحلم يهدا حبة
نفسها مرة ف صفاه
زى ناس ف الليل بتدعى
للنهار ييجى بضياه
بردو ناس للفجر صاحية
و النهار مش محتاجاه
سهرانين الليل ف عالم
كله جرح .. و كله اه
عشمانين لو بكره جالهم
يبقى جايب حتى ضحكة
او يشيل الشوك و طرحه
تفضى منه حتى سكة
جوا ارواحهم حكاوى
الف طعنة و الف شكة
و احتمالهم غصب عنهم
زاد و فاق الاحتمال
الابتسام خاصم وشوشهم
و فى ضميرهم ميت سؤال
هى ليه الدنيا قاسية ؟
ليه الفرح اصبح محال ؟
ليه نهار بكره معاندنا
حتى حمل الراحة مال ؟
زى ناس العشق خدهم
ف الوجع و الشوق رماهم
شمسهم على غفلة تغرب
وجدهم يفضل معاهم
الحبيب سافر و ناسى
فالقمر غاب عن سماهم
و النجوم طفيت فى عينهم
و البكا .. كان غاب و جاهم
زى ناس خط البداية
من زمان رافض يبان
كل ما يقرب .. بيبعد
نغمة مخنوقة ف كمان
و الليالى غصب عنهم
دايرة بتعيد اللى كان
السنين هياها فعلا
و المكان ... نفس المكان
زى ناس الدنيا جاية
فاتحة ليهم الف باب
فرحهم ساكن عنيهم
بالحبايب و الصحاب
النهار ييجى ف معاده
زى ما يقول الكتاب
و المسا جايب نسايم
نادرا لو مرة غاب
ناس و ناس و الدنيا لسه
واخدة ناس و اهى جابة ناس
مستحيل عجلتها تركن
او يتوه منها المقاس
اللى مكتوب فيها سارى
و القدر هو الاساس
#فهمى_على
قادح زناد الحروف للنشر والتوزيع
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة