فى قلب السجن ياولدى غلبت أناديك
حيطان السجن سمعتنى وانا بناجيك
سنين الدمع على خدى وأملى اجيك
تعاله هم واسمعنى يا واد بناديك
زرعت الأرض من كدى وتربيتى ليك
الأبن
يابويا اهده وخلاص أرتاح
يومياتى أدعى مسا وصباح
ادام الشمس من المشرق دعايه مباح
برئ فى الحبس يابويا ..وانا سواح
أقول الشعر على بابك وشعرى نواح
فاكرنى يابا مش سمعك ليه صوتك لاح
الأب
ماالقاضى ليه أوراق بكفايه يابنى عناد
أرجع للأرضك ودارك ومسيرنا بنا معاد
انا وحيطان السجن بقه مابنا وداد
والبعد على عينى والشوق في قلبى ذاد
والظلم مهما طال الحق جى بمعاد
ياولدى دمعك عزيز أمسح دموعك ياواد
الأبن
فاكرنى يابا فى بعادك عايش سعيد مرتاح
عذابى نفس عذابك ودقت ياما جراح
أنا المسجون وكل الكون معدش براح
صحابك نسيه افضالك وقالو أهو راح
وبكره اكيد تعود ليه وأقيم الأفراح
ومهما الدنيا تعاندنا لازم نرتاح
الأب
سامحنى ياولدى الحمل رميته عليك
أنا المتغمى لكنى بشوف بعنيك
وعارف كله دلوقتي بيشمت فيك
شايف دمعه فى عيونك..ايه يرضيك
برئ فى الحبس اه يانا منايا افديك
وأقولك كلمه جوايا يافرحتى بيك
الأبن
يابويا انتا إلى فوق راسى
و ربيتنى و مش ناسى
اخلى الحق نبراسى
مهما اعانى وى ااسى
فى عز الشده بتواسى
مداسك يابا فوق راسى
الأب
ياصحبه زيف يامنسيه
يا أيامى يا عنديا
عشان غلبان مليش ديه
أشوف الغدر بعنيه
يادنيا عايزه منى أيه
دموع أبنى أهى فى عنيه
الأبن
بلاش تبكى على اللى راح
طريق الحق أخره نجاح
أكيد هنشوف ليالى ملاح
صوتك لسه بيصحينى كل صباح
جبت لك يابا التفاح
خير أرضك وكله فلاح
الأب
سمعت ندايه ياولدى وانا بناديك
حيطان السجن بدمعها قالتها ليك
برئ ساكن في احضانى غلب يناجيك
صحيح الفكر ودانى وجبنى ليك.. ياولدى اتاريك
تقول الشعر علشانى حافظ كل اشعارى ودمع عنيك
ياولدى اهده واتأنا أنا حملى وسندى عليك
بقلمى
عبدالفتاح معروف محمد الشاعر
فى قلب السجن
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة