بعد حادث غرق ثمانية من الأطفال والصبية في نهر النيل كانت تقلهم سيارة محمولة على معدية ( عبارة ) في منشأة القناطر و علي متنها ٢٨ من الأطفال والصبية يوم الإثنين ١٠ من يناير ( كانون الثاني ) سنة ٢٠٢٢ تفاعل قلمي وسطر هذه الكلمات :
---------------------------
بشعر العامية المصرية .
( ضحايا الفقر اللعين )
أطفال في عمر الزهور
ومعاهم بعض الشباب
كل يوم ساعة البكور
يطلعوا ف رحلة عذاب
رحلة كل يوم عبور
من بلدهم وسط النيل
راكبين سيارة الحضور
سياره متشاله شيل
لا محطات ولا مرور
على معديه عبر النيل
فيها أكتر من تلاتين
طفل وشاب م الجنسين
من كام يوم الجو بارد
والعواصف ع الشطين
خلصوا شغل وراجعين
والسياره مالت ميل
مره شمال ومره يمين
الحمل فوقها كان تقيل
الخوف والرعب ف قلوبهم
شايفين الموت خايفبن
مين بس يقدر ينقذهم
وبخفف صوت الأنين
الاستغاثه بدأت تعلا
كلهم رفعوا الإيدين
الحقونا خلاص بنغرق
المنظر صعب ومهين
وكان الرد من عالشط
مش حنلحق مش قادرين
القدر كان أسرع منهم
مات واحد ووراه اتنين
ما باليد أبدا حيله
مين ينقذ شباب واعدين
الواحد يساوي قبيله
والهمه تساوي ملايبن
غرقت بيهم السياره
سياره على مركب هالك
لا معديه ولا عباره
والطريق ما كانش سالك
من غير علامه أو إشاره
ربي نجي م المهالك
عباره أسوأ م السياره
وكل يوم الحال كذلك
مفيش أمان للاتنين
ومات تمانيه في غمضة عين
**** **** ****
الأطفال كانوا راجعين
لبيوتهم ومبتسمين
كلهم بيساعدوا أسرهم
بأجورهم وكانوا صابرين
شغلهم كان في مزرعه
للدواجن غرب النيل
ببطلعوا مع نور الفجر
ويرجعوا ساعة الأصيل
كل واحد أجرة يومه
خمسين جنيه وكانوا راضيين
كل واحد عنده همومه
والأهالي فقرانين
والأطفال صعبان عليهم
تعب الأهل الشقيانين
كل واحد أجرة يومه
عارفه هيا رايحه فبن
لكن فرحتهم ما تمت
وما رجعوش المساكين
و الدنيا كلها اتلمت
في مشهد مهيب وحزين
يدفنوا الجثث اللي خرجت
نعزي مين ولا مين ؟
**** **** ****
طفل محتاج درس خصوصي
أبوه يجيب فلوسه منين
قرر يشتغل ويساعد
ويوفر أجرة اليومبن
يدفعهم لمدرس واحد
لأن أهله مش قادرين
وبنت مخطوبه حتوفر
مبلغ تشتري طقمين
بتجهز ليوم فرحتها
محتاجه لشرا فساتين
شايفه حالة أبوها صعبه
م الفلوس خالي الإيدين
الله يرحم أطفال شهدا
ضحايا للفقر اللعين
كلهم ماتوا في لحظه
وتركوا الحزن للعايشين
أهل القريه عاشوا الصدمه
خرجوا يدفنوا الجثامين
والحزن كاسي بلا رحمه
وجوه ثكالى ومكلومبن
رحم الله أبا الحسين
علي أمير المؤمنين
قال كلام عن الفقر
عبره و عظه للسنين
كلام يبين خطر الفقر
واحنا عنه غفلانين
( الفقر دا لو كان راجل
كنت قتلته بالإيدين )
وأنا بقول في كل عصر
الإهمال أثره مشين
كله حزن وكله قهر
فيه ضحايا ومجروحين
جلب علينا ذل وفقر
مين يشيل دا كله مين ؟
**** **** ****
بقلم د / عبد الرحمن فتحي الحناوي .
من مصر .
الخميس ١٣ من يناير ( كانون الثاني ) سنة ٢٠٢٢ .
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة