سُكِّي شيش البلكونات
الشِتا حضن اختفى
والدَفا صوتِك ف ودني
لما رمشِك بيهاودني
سُكِّي شيش البلكونات
يالله سيبَك م اللي فات
المهم انتَ واحشني
والغياب ده كان حايشني
وامّا شوقَك بيناغشني
طيفي بيزورَك ساعات
لمّا برد العُمر يقسَى
تفتكِر .. عمري ما هَنسى
بس لِسَّه العمر لِسَّه
لِسَّه فاضل فيه حاجات
سُكِّي شيش البلكونات
رُدِّي ضلفة واربها قلبي
ع الحنين المستخبي
وأنتي طفلة معاه تِشبّي
تبقي أحلى من البنات
سُكِّي شيش البلكونات
سيبي ضلفة وراها كُنتي
كُنتي دايماً زَي مانتي
جِه عليكي زمن كِبرتي
وامّا رُحتي
صِرتي أحلى الذكريات .
حسام بخيت
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة