.jpg)
في الشوارع وجوه غريبه
وجوه غضبانه ووجوه فرحانه
وناس ماشيه تكلم نفسها
وناس ماسكه خرزانه
وشباب بيولع ويشرب سجاير
وناس عيونها رايحه وجايه
بتابع وتبص على بعضها
وناس بتتفرج على الڤتارين
وناس بتشتري جوه الدكاكين
وعربيات رايحه وجايه
وسط الزحمه وناس تايهه
مش عارفين رايحين على فين
وع الرصيف بيايعين فرشين
وتحت الرصيف العربيات ركنين
وبياعين خضره وجرجير ولمون
وراجل قاعد رجليه مقطوعه
ساعديني ياهانم ساعدني يابيه
وياااه ع الروايح الكريهه وزباله
ومية مجاري في كل مكان
والناس لافي سلام ولا كلام
وبنات وولاد وكتير رنات
وكلام خد وهات طول الطريق
وصوت عالي وزعيق وخناق
والرايح والجاي يمين وشمال
وعيون زايغه ع البنات والنسوان
ولبس مقطع ومحزق ومنه يبان
تقاسيم الجسم وكأنه عريان
وأدان ع المدنه وجرس كنيسه
ومين يلبي الندا يا انسان
عيني عليك ماشي تايه حيران
والهموم كتير مصاريف وفواتير
والولاد ع القهوه قاعدين
ومين فاضي يقول السلام
ومين اللي يرد عليه
ابراهيم محمد آدم
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة