لما انت ناوي تبيع حبي
بالشفعة برضه انا الشاري
لما انت فرطت ف قلبي
كت صفعة زادت من ناري
مش هشتريه علشان باقي
على حبي او على عهدي معاك
دي كرامتي دائي وتريائي
انا مش هموت على شط هواك
إنِ إشتريت بشتري روحي
وبداري على سري وبوحي
عشان ما اعِّش ف اوجاعي
عشان تطيب كل جروحي
حدفع كتير وانت الخسران
ومهما ادفع انا كسبان
كفاية إني اكسب روحي
واسيبك انت تعيش ندمان
وإن جيت في يوم عايز ترجع
في البيعة ليك انا مش هشفع
ياللي انت فَرَّطت ف حبي
مش هرجع انا مهما هتدفع
الحب مش بِيعَة وشَروَة
الحب عمره ما كان ثروة
الحب يعني حنان وامان
وتشوفه قصر ولو دِروَة
الحب يعني حنان وامان
وتشوفه قصر ولو دِروَة
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة