بيحبني بس معانِد
آل عامل إنه مش واخد
في باله وإنه مش عارف
بنظرة مني يتَّاخِد
ودا كله بس عشان إنه
ما يدِّي الحب ولا ياخُد
يا سيدي خلاص بلاش مِنك
ومش عايزين وداد مِنك
ده لو حبك ماجاش منك
ما احبش وانت مش رايد
بيحبني بس مكابر
وللخاطر ماهوش جابر
مع إنه للهوى مشتاق
وع البعد ماهوش صابر
باين عليه ف نظرة عينيه
وف لهفته لما بسافر
التقل ليه والعند ليه ؟
ليه في الغرام ليه بيعافر ؟
بيحبني طب ليه تقلان ؟
وعامل إن الواد زعلان
حركاته مش خايله عليا
كدبه ف عينيه على طول بيبان
وانا حاعمل إني مانش عارف
على زعله إني كمان خايف
واهو كله دلوقتي بيمشي
حقيقي كان او كان زايف
بيحبني مسيره يجيني
ويقوللي قرَّب وارويني
من عطف قلبك وحنانك
وريني حبك وريني
وهبقى على سابق عهدي
ومش راح اسقيه من صدي
لاني متأكد إنه
بيحبني ورايد ودي
لإني متأكد إنه
بيحبني ورايد ودي
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة