يا عابد المال دا عمر المال ما بيعلي
لا جاه بيرفع واطي ف يوم ولا يعلي
بالعلم ويا الأدب تسكن قلوب الناس
ولو ملكت الماس عمر الماس ما بيعلي
..............
الستر أنواع مش انك تعيش ف قصور
لو ذلتك صحتك ما يفيدك عبيد وقصور
لو عشت مكسور يبقي يغور رصيد زايف
أعمي ومش شايف اللي بثروته منصور
................
الستر يبقي ف ولد عارف حدود الله
ويبقي دهر وسند للي شقي ورباه
ووقت ما تقول آاه يبقي لجرحك دوا
يخاف عليك م الهوا ويحكم بشرع الله
...............
الستر زوجة تكون ستر وغطا وسكون
ترد غيبتك وأبدا لا بتغدر ولا بتخون
هي لزوجها السكن والفرحة والراحة
وبتبقي فلاحة وبتعلم بنات الكون
...............
الستر هو الرضا بالقسمة والمكتوب
ولو ف عز الشتا بيتك قوالب طوب
ولو تبات غالب بكره هيجي يوم
تتمني فيه النوم ولو تبات مغلوب
............
إياك تطاطي الراس عشان تعدي قوام
وحتي لو عديت حاسب تقع قدام
دا اللي ف بحورها عام غرق وتاه فيها
واللي نجي فيها هو اللي مش عوام
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة