ورايح فين؟
هنا أحلى
بلاش تبعد
بلاش تتغر بالرحلة
هنا حتلاقي احبابك
وأصحابك وخلانك
وأوقاتك كمان تحلى
ورايح فين ؟
وليه تعافر ؟
وليه تغامر ؟
وده طبال
وده زامر
ومش عارف
مين المخلص
ومش عارف
مين الغادر
بلاد الحب
بلاد الحب مجهولة
وإنت يا دوب
يادوب بتخطِّي وِبتِحبِي
يادوب لسه ف سنة أولى
ولِسَّاك في الهوى أخضر
وصعب تروح بلا خبرة
فما تفارقش أحبابك
ده إيد البعد مشلولة
وصدقني
أنا خايف عليك جداً
عشان شايفك وحاسس بيك
وشايف اللي بيوسوس
وعامل إنُه قلبه عليك
وكل هناه وكل مناه
تسيب ذاتك تفوت اراضيك
تسيب الأهل والعزوة
وهيألك حياه حلوة
وفى الآخر حيشمت فيك
تعالى
تعالى عيش ما بين اهلك
ده أحضانهم بتندهلك
وأحلامهم شعاع من نور
فخد منها اللي يحلالك
وحققها على مهلك
وع الحلوة وع المرة
ودي مرة ودي مرة
دي كلمة قالوها أجدادنا
عايش اهلَك ولو تُهلَك
دي كلمة قالوها أجدادنا
عايش اهلَك ولو تُهلَك
شكرا لمروركم لا تنسوا متابعة المدونة ومشاركة نصوصكم على صفحاتكم ومواقع التواصل كافة